A Escola de Cantería da Deputación de Pontevedra recibiu durante a mañá deste xoves 23 de novembro a visita de tres profesores xordanos da Al-Aibyt University, que tamén estiveron acompañados por profesorado da Escola Superior de Conservación e Restauración de Bens Culturais de Galicia.

A Al-Aibyt University, considerada unha das dez mellores universidades de Xordania, está situada en Mafraq, a menos de oitenta quilómetros de Amán, capital do país.

Os profesores xordanos, que chegaron á Escola de Cantería interesados polo traballo que desempeña o centro de formación da Deputación de Pontevedra, puideron coñecer de primeira man os traballos que os alumnos e alumnas da Escola de Cantería desenvolven o longo do ano e as experiencias de colaboración que teñen en diferentes países do mundo.

Os estudos que realiza o alumnado na Escola de Cantería son eminentemente prácticos, por iso as saídas e visitas de estudos forman parte integral do proxecto educativo do centro. Froito desta formación práctica, moitas das obras de arte, como cruceiros, monólitos, conxuntos escultóricos, bustos, peañas ou construcións arquitectónicas, que leva a cabo o alumnado están a ser situadas en lugares de Galicia, de toda España e tamén de Brasil, México, Arxentina, Panamá e Portugal. Ademais, antigos alumnos e alumnas están a traballar na restauración do Capitolio de Washington e do barrio de Chiado de Lisboa, así como a desenvolver actuacións de rehabilitación da Catedral de Santiago ou Westminster en Londres e de construción da Sagrada Familia de Barcelona.