A Escola manterá aberto o prazo de preinscrición para acceder aos estudos de canteiro ou canteira, ata o 14 de setembro. As persoas interesadas só teñen que cubrir un formulario dispoñible na páxina web da Escola, e posteriormente, do 17 ao 26 de setembro, terían que formalizar a matrícula achegando toda a documentación necesaria.

Para acceder aos estudos de cantería é necesario posuír un título de graduado escolar ou equivalente. Son tres anos de formación teórica pero sobre todo práctica e hai 25 prazas dispoñibles para cada curso. Os ámbitos profesionais futuros ao rematar os estudos céntranse sobre todo na construción, na escultura, na restauración e na rehabilitación.

Ademais de manter aberto o prazo para estes estudos de cantería, desde a Escola tamén está activo o prazo para anotarse nos estudos de mestre ou mestra canteiro ou canteira. Son dous anos de formación e para acceder é preciso posuír o título de canteiro ou canteira. Ademais, tamén está dispoñible o prazo para preinscribirse nos estudos de formación específica da Escola para aquelas persoas profesionais ou artesás que queiran aprender ou mellorar a técnica.

Os estudos que realizan as alumnas e alumnos na Escola de Cantería son eminentemente prácticos e supoñen a realización de múltiples obras. Moitas delas, como cruceiros, monólitos, conxuntos escultóricos, bustos, peañas ou construcións arquitectónicas están a ser situadas en lugares de toda Galicia, de toda España e tamén do estranxeiro, como en Brasil, México, Arxentina, Panamá ou Portugal. Ademais, antigos alumnos e alumnas están traballando en sitios emblemáticos, coma na restauración do Capitolio de Washington e do barrio de Chiado de Lisboa, así como actuacións de rehabilitación da Catedral de Santiago, de Westminster en Londres e de construción da Sagrada Familia de Barcelona.